SVPPOPVLINVS LXX ANNOS COMPLEVIT

VTRIVSQVE LINGVAE GRAMMATICI MOSCOVIENSES

ALEXANDRO SVPPOPVLINO BASILII F.

(QVI ET PODOSSINOV)
VIRO DOCTISSIMO ET CLARISSIMO
SALVTEM PLVRIMAM DICVNT.

INTER NOBILISSIMORVM VIRORVM NOMINA, QVI QVONDAM DISCIPVLI NOSTRI POSTEA ERVDITIONIS SVAE FAMA PERCREBRVERVNT, TVVM IAM DVDVM SIDERIS CVISDAM INSTAR EMINERE NEMO NOSTRVM EST QVI NESCIAT.

DE VTRAQVE LINGVA VTILISSIME COLENDA ET EXPLORANDA, DE POETARVM ORATORVMQVE OPERIBVS LVCVLENTISSIME ENODANDIS, DE TOTIVS ORBIS TERRARVM GEOGRAPHORVM LIBRIS TABVLISQVE GEOGRAPHICIS PVLCHERRIME INVESTIGANDIS, DE EPHEMERIDIBVS DOCTIS IVSTO ORDINE IN LVCEM PROFERENDIS, DE SODALIVM ANIMIS MIRA QVADAM PRVDENTIA TOT ANNOS REGENDIS TE OPTIME MERITVM ESSE ET SCIMVS ET DECORI MAGNO NOBIS HOC PVTAMVS.

NON POSSVMVS TAMEN, FATEMVR, CVM COLLOQVIORVM TVORVM HVMANITATIS, CENARVMQVE ETIAM MAGISTERII VRBANISSIMI, TVM LVMINVM ILLIC TRANS FLVMEN PROCVL FVLGENTIVM ILLIVSQVE OCVLIS SVBNIGRIS ADVLESCENTIS EQVITIS FATO SANE DEFLENDO EREPTI OBLIVISCI.

ITAQVE HOC DIE NATALI TVO CELEBERRIMO ET IVCVNDISSIMO, QVO
SEPTVAGINTA ANNOS COMPLEVISTI,

LAETI LIBENTESQVE HVNC DIEM TIBI GRATVLAMVR EXOPTAMVSQVE, VT EADEM QVA SOLES INDVSTRIA ATQVE STRENVITATE OPERA TVA PVLCHERRIMA PERGAS, PRAESERTIM VERO VT NOSTRIS INIQVIS TEMPORIBVS QVAM OPTIME VALEAS.





















https://www.philol.msu.ru/~classic/news/2020/Alexander_Suppopulinus_LXX_annos_compleuit/index.php

ORATIO HODIE HABITA

"Omnia praetereunt, amici: hoc quoque praeteribit. Grauia olim pericula res publica nostra fecit, et a Pincenatibus et a Cumanis saepe uexata. Omnia illa Ruteni superauerunt: hanc quoque pestem, coronatum uirus, ut reliqua omnia, coniunctis uiribus uincemus."

CONVENTVS NOSTER IANVARIVS

ACADEMIA MOSCOVIENSIS ELISABETANA LOMONOSOVIANA

SCHOLA GRAMMATICORVM

VTRIVSQVE LINGVAE GRAMMATICORVM STATIO
LINGVAE GRAECAE MEDIAE INFIMAEQVE STATIO

DE VTRAQVE LINGVA ET HVMANITATE TRADENDA

COLLOQVIVM

RATIONI STVDIORVM ELABORANDAE

Moscouiae ab a. d. IV Kal. Febr. usque ad pridie Kal. Febr. (diebus XXIX–XXXI Ian.) anno MMXX p. Chr. n., MMDCCLXXIII a. V. c.



VTRIVSQVE LINGVAE GRAMMATICORVM STATIO

LINGVAE GRAECAE MEDIAE INFIMAEQVE STATIO

VNIVERSITAS ACADEMIARVM PROVINCIALIVM VTRIQVE LINGVAE ET HVMANITATI TRADENDAE

CONSILIVM AcademiarVm RVtenICarVm LINGVAE LATINAE FAVENDAE ET VOCABVLIS MEDICINALIBVs et medicamentariIS ELABORANDIS

QVO PROPONVNTVR

a. d. IV K. Febr. (d. XXIX Ian., Mercurii die)

Participes ab hora X a. m. aud. XI (pedeplanis) nomina sua in tabulas referenda curabunt.

CONSESSVS MATVTINVS

hora XI a. m.

Praeside ALEXIO SCATEBRANO RVTENO Professore, Vtriusque Linguae Stationis Procuratore, Doctore rerum grammaticarum

ALEXIVS SCATEBRANVS RVTENVS. Contio de summa rerum anni p. Chr. n. MMXIX (siue a. V. c. MMDCCLXXIII) ad utriusque linguae grammaticam pertinentium. Valentinae NOVODRANOVA Theodori f. diei eius natalis quasi iubilaei causa gratulatio.

NICOLAVS KAZANSKIJ NICOLAI f. De hymnographia ueterum.

MICHAEL BIBIKOV BADIMI f. De uita Theodosii Chiouiensis nuper inuenta.

ANNA PICZCHADZE ABRAHAE f. De uerborum structuris quae post uerba sentiendi in utraque lingua adhibentur.

HELENA SKVDAR’ VALENTINI f. De litteris quas Maximvs Niedermann et Apollo Hruška Apollinis f. inter se dederunt.

Consilium horae dodrante (XV minutis) interrumpitur

De utriusque linguae grammatica et humanitate in nostrae aetatis doctrina tradendis

FIDES MOSTOVAJA GENNADII f. De noua Statione utriusque linguae, quae nuper in Schola Aerarii Administrandi condita est, atque quo modo illa difficultates ortas tollat, quam studiorum rationem habeat.

MARINA SLAV’ATINSKAJA NICOLAI f. De utriusque linguae grammatica post Bellum Magnum Patrium et temporibus uniformitatis communis tradenda.

ANASTASIA POTAPOVA MAXIMI f. De disciplinis, quae ad Graecorum et Romanorum litteras et antiquitates pertinent, in Academiae Moscouiensis Elisabetanae Lomonosouianae Schola Interpretandi docendis.

Ab hora II p. m. usque ad horam II p. m. et dodrantem prandebitur.

CONSESSVS VESPERTINVS

Hora III p. m.

Praeside HELGA SAVEL’JEVA MICHAELIS f., Candidata rerum grammaticarum

THAMAR TEPERIK THEODORI f. Quo modo Cleopatrae persona in scaena et in taeniis cinematographicis inducatur (earum rerum, quae omnium Academiae Mosouiensis scholarum discipulis proposita erant, excerptum).

THEODORVS SCHELOV-KOVED’AJEV BADIMI f. De inscriptionum Graecarum nuper Panticapaei inuentarum sermonis indole.

TYCHO DAVIDIANVS GEORGII f. De Theodori Korschii carminum Graecorum materiarum et operum et uerborum uarietate.

HELENA PRICHOD’KO VALDEMARI f. De Asiae Minoris oppidis Graecorum adhuc ignotis.

ALEXANDER SVPPOPVLINVS BASILII f. rationem de Societatis utriusque linguae magistrorum Rutenorum operibus anno MMDCCLXXII a. V. c. susceptis reddet.

Recentes libri proponentur

ALEXII BELOUSOV LADISCLAI f. De Graecorum et Romanorum religione Noui Testamenti aetate quae uiguit. Moscouiae, MMXX.

ALEXANDRI SVPPOPVLINI BASILII f. Anthologica poetarum epicorum Romanorum. Moscouiae, MMXX.

ALEXII VESTIGIARII GEORGII f. Colloquia Rutenico-Latina, siue de Lingua Latina uiua.

MARINAE SLAV’ATINSKAJA NICOLAI f. De utraque lingua et humanitate tradenda. Fasc. ΙV.

Hora V semis p. m.  cenabitur.

a. d. III K. Febr. (d. XXX Ian., Iouis die)

Praeside IOANNA ZABUDSKAJA LEONIDAE f., Candidata rerum grammaticarum

Ab hora X a. m. usque ad horam XI a. m.

MARINA SLAV’ATINSKAJA NICOLAI f., ut mos est, de lingua Graeca disputabit.

VALERIVS BUDEJKO EDVARDI f. Quem statum utraque lingua docenda in Ruteniae ludis et Academiis hodie habeat.

MARIA KARPUN ALEXANDRI f. Quid Academiae tironum ad utramque linguam et humanitatis studia docenda conferre possint.

Ab hora XI a. m. et quadrante usque ad horam I p. m.

CORNELII NEPOTIS Vitae praelegentur.

NICOLAVS KAZANSKIJ NICOLAI f. Attici initium

ALEXIVS SCATEBRANVS RVTENVS Attici finem (Nep. Att. 13–22)

MARIA KAZANSKAJA NICOLAI f. Themistoclem

Ab hora I p. m. usque ad horam II p. m. prandebitur.

Ab hora II p. m. usque ad horam IV p. m.

HELGA PAVLINA SERGII f. Hannibalem

ELIAS GIMADEIEVIVS RVSTEMI f. Hamilcarem praeleget.

Hora IV p. m.

Taenia De occasu interituque Rei Publicae spectabitur.

Hora V semis p. m.

Omnes in utriusque linguae stationis bibliothecam cum sodalibus disputandi causa conuenient.

Pridie K. Febr. (d. XXXI Ian., Veneris die)

Hora I p. m., hora I p. m. et quadrante, hora I semis p. m.

Museum artium liberalium Puschkinianum ad tabulas pictas Thomae Gainsborough et alias res propositas spectandas adibitur.

Kalendas Ianuarias et Christi Diem Natalem gratulor

Kalendas Ianuarias et Christi Diem Natalem gratulor atque Mauri Augusti nostri carmen ad hanc occasionem scriptum subiungo

Precatio pro faustis novi anni auspiciis
En Christus medio brumali frigore natus
Infans ingenua Virgine blandus adest.
Illuxit rursus nostraeque salutis origo,
Fulsit nunc iterum spes rediviva homini
Acceditque dies veteris qui terminus anni
Haeret et auspicium prodit in orbe novum:
Virginis e gremio pax aurea pectora purget
Atque hominum generi prospera saecla ferat.
Hoc pariter votum, scateant ut semper amici
Ipsi quae cupiant, nec cupiantque, bonis.
Vivant et valeant, donis sine fine fruentes,
Quīs en ex animo haec pia vota precor.
MAURUS AUGUSTUS
a.d. VIII Kal. Ian. MMXVIII





Vide sis
http://www.philol.msu.ru/~classic/news/2019/01_Maurus_Augustus.php